::: دوامة ::: دوامة مراكبنا .. تقلبنا تكركبنا .. واحنا فيها غرقانين

مشكلة كبيرة من الصعب على العقل انه يتصورها مش عارفلها حل قولت احطها يمكن انى الاقي حد يساعدني فى حلها

المشكلة بدأت من تليفون من واحده من اصدقائي الى بحبهم جدا وكانت بتعيط بطريقة عمري ما سمعتها ولا شوفتها قبل كده بطريقة صعبه جدا كنت بموت وانا بسمعها بتعيط وكان جمبها اختها وكانت برضه بتعيط بنفس الطريقة

طبعا من البداية انا قلقت اوي فكرت لا قدر الله حد ماتلهم وكنت بتكلم بهدوء جدا والحروف بتوه مني ومش عارف اجمع اى كلمتين على بعض

فوجئت بأنها بتقولى دي اخر مره اكلمك فيها لإنى ناوية اهرب من البيت واكيد لو هربت هتتغير حياتي وهبقي حاجه تانيه متشرفكش انك تعرفها طبعا كان كلام دخل فى ودني زي الصاعقة وسط علامات كتير من الابهام والغموض ...هو فيه ايه !!

حاولت اهديها بس كان شئ من المستحيل انه يحصل طول المكالمة اللى استمرت حوالى خمس ساعات بس قدرت انى اوصل لبعض الكلمات اللى وصلتها مع بعض بصعوبة وكأني بحل اصعب معادلات قابلتنى فى الميكانيكا او الفزيا

بعد مماطله ومجادله رهيبه معاها قدرت انى اعرف منها سبب بكاها وسبب انها عايزه تسيب البيت وكانت اصعب مشكلة بل اصعب كارئة ممكن اتخيلها او انى اقدر اكون مسئول عن حلها

من زمان واصدقائي كانوا بيجولى عشان احللهم مشاكلهم وكنت الحمد لله ببقي موفق وبقدر ..لكن فى المشكلة دي كنت بتمني انى مكنش موجود ولا انى اكون سمعت حاجه وكنت بتمني انى ابقي مغيب او تايه على الاقل هيكون ارحم من الكلام اللى سمعته

ابتدت كلامها بانها قالتلى انهم هينقلوا من شقتهم اللى قاعدين فيها وهيروحوا بيت العيلة ( بيت مامتها ) ..اكيد حاجه عاديه ومفيهاش اي مشاكل ده بيتها وده بيتها بس لاحظت انها مصره على انها لايمكن تدخله وانها مش هتقدر وانها حاولت الانتحار تلت مرات قبل كده لما ضغطوا عليها انها تدخل البيت ده ...

طبعا كلام صعب وبينشئ كتير من الافكار الوحشه جوه عقل الواحد ...ليه ده كله و هنا الوسواس بيلعب دور كبير اوووي فى المرحلة دي

سألتها هو انتى مضايقة ليه من هناك هو فيه حد مضايقك قالتلى لا ...سكتت وقولت طيب فيه ايه !! ليه انتى مش عاوزه تروحي هناك فانفجرت فى العياط لدرجة انى كنت انا كمان هنفجر معاها فى العياط بس مسكت نفسي عشان انا عاوز اخرجها من الحالة دي مش ازودها عليها

حكتلي ايه السبب وكان اقبح حاجه سمعتها فى حياتى ومعتقدش انى ممكن اسمع حاجه اقبح منها مهما عشت او شوفت فى حيتى

الحكاية روتها وهيا بتنزف دموع من قلبها وقالتلى انا حياتي مدمرة ، محدش فاهمني فى البت وكله ماشي فى اتجاه بابا فى اتجاه وانا فى اتجاه وماما فى اتجاه كله بيحب نفسه ومبيفكرش فى التاني بابا وماما كل اللى بتربطهم المصلحة وسرير بيتقابلوا فيه مره فى الاسبوع وممكن كمان يقعدوا شهور مبيتقابلوش مع انهم ساكنين فى بيت واحد

لما كانوا بعاد عن بعض كان من السهل ان اى حد فيهم يعمل علاقات مع حد تانى مش كده وبس ممكن يتمادي لاكتر من علاقة...وده اللى حصل

بابا بيخون ماما وماما بتخون بابا وكله بيحصل قدامي وانا بشوف كل حاجه حتى كمان بابا عارف اني شوفته وبيكمل عادي وماما عارفه ان انا شوفتها وبتكمل عادي وكأن ولا حاجه حصلت ولا كان انا بنت وده غلط...وصلت السفاله انهم يتعاملوا فى الرجس كده عادي ويحللوه قدام عنينا واحنا بنات انا واختى الصغيره ..

طبعا ان ساكت ومش قادر اتكلم ...اتكلم اقول ايه يعني

بعد شويه قولتلها انتى متأكده من كلامك ده قالتلى انا شوفت بعيني فسكتت وقولتها وبعدين ؟

قالتلى ان الحوارات دي بتحصل قدامها من اكتر من تلت سنين وبتتكرر فى كل مره وكانت بتحاول انها تصمد وتقنع نفسها انها ممكن تخرج من وسط الغمة دي وتسيبهم ده على حد كلامها فى الاول بالجواز

بعد فتره كبيره من الصمت فى محاولة من لاستيعاب الصدمة سألتها وايه علاقة الكلام ده بالبيت التاني بيت العيلة يعني ..قالتلى ده بقي اللى حصل فيه افظع من كده طبعا انا تعجبت من كلامها وسألتها هو فيه اصعب من كده وكانت الصدمة اللى بتنضاف الى كتيبة الصواعق اللى عماله تنزل عليا انها قال اه فيه افظع من كده

بقيت مش عارف اقولها كملي ولا اسكت ..بس كان واجب انى اسمع منها واحاول اجنبها شر اللى هتعمله لانه من اصدقائي وواجب عليا اقف جمبها

قالتلى فى مره مكانش فى البيت الا انا واختى وبابا وروحنا بيت العيلة ومكانش فيه الا جدتها ( أم أمها ) ..كلوا وشربوا ودخلوا ناموا بس انا مكانش جايلي نوم فى اليوم ده ففوجئت ان فيه حد ماشي فى الصالة فاتسحبت أشوف هو مين فطلع بابا !!

كان داخل اوضه جدتي فروحت وقفت جمب الباب بعد ما قفله فسمعت كلام مش كويس وضحك واصوات فمقدرتش اصدق انها وصلت للدرجة دي ففتحت الباب ولقيت بابا وجدتي ( ام امها ) مع بعض نايمين وكأنها أمي ..طبعا انهارت ووقتها جريت عشان انتحر وفى الاخر لحقوني حاولت تلت مرات وهما لحقوني فى كل مره وكانوا بيداروها

فى الوقت ده بعد كل الكلام اللى سمعته منها حسيت ان انا نسيت الكلام مبقتش مصدق هل انا عايش ...ده حقيقة ولا حلم !!

وذادت الطين بله لما قالتلى انهم عاوزين يجوزوها غصب عنها لابن عمها والىل قعدت معاه وحاولت انه تقنعه انه مش مناسب ليها وهو بكل برود وغتاته يقولها بعد الجواز هتحبيني وهتموتي فيا وفى كل مره كانت بتتخانق معاه وتهزأه عشان يسيبها وهو يعند معاها ..

يعني لا بيرحموا ولا بيخلوا رحمة ربنا تنزل ( استغفر الله العظيم )

فى الآخر قالتلى انا كنت بكلمك عشان اقولك ان انت اعز حد ليا على الارض ومش عاوزاك تزعل مني لو عرفت اني بقيت حاجه تانيه وحشة لانى ههرب من البيت وهعمل اى حاجه عشان ابعد عن الحياة دي حتى لو كانت غلط

وقالتلى انها مش عاوزه انى يبقي ليا علاقة بحد زيها وان انا انسان جميل وكويس ومينفعش انى اعرف واحده هتبقي فى وضعها الجاي

طبعا انا فضلت اهدي فيها واحاول ابث فيها الثقه

الاول مكنتش عارف اقول ايه ولا اتكلم ازاى بس سبحان الله ..ربنا كان معايا وقتها وقدرت انى اهديها واقنعها طبعا لانى استعنت بربنا فمدني من عنده وهداها

بس انا لحد دلوقتى مش عارف ممكن اساعدها ازاى ولا اعمل ايه ؟؟ هل انا اللى هقوله ولا اعمله هيبقي ليه فايده ولا ممكن يغير وضع حياتها الميأوس فيه ده ؟؟

انا محتاج لجواب على كلامي ده ..ياريت تساعدوني فى المعضلة دي